FALSAFAH PAKAIAN HITAM

BAJU

Babaju hitam gadang langan, langan tasenseang tak pambagi bukan karano dek pamberang, pangipeh angek nak nyo dingin, pa ampeh miang di kampuang, pangikih nan bungkuak saruweh, ka pambuang sipaik nan buruak.
Siba batanti timba baliak, mangilek mangalimantang, tatutuik jahitan pangka langan. Mambayangkan mauleh tak mangasan, mambuhua tak mambuku.

batang aua ba atok tungku
pangkanyo sarang limpasan
padi basasok jo ba ilalang
sariak na indak paguno lai

mambuhua kok mambuku
mauleh kok mangasan
budi kok tampak dek urang
hiduik nan tidak paguno lai

Lauik ditampuah tak barombak, padang ditampuah tak barangin. Budinyo aluih bak lauik dalam, sipaiknyo bapantang ka-ajuakan, mangampuangan pasia nan jadi pantangannyo.
Langan bamiliak kiri jo kanan, bamisiak makau kaamasan, gadang barapik jo nan ketek, tando rang gadang bapangiriang. Tagak apuang jo aturan, adat limbago nan mangapuangkannyo. Baukua jambo jo jangkau, unjuak baagak bahinggokan, murah jo maha di tampeknyo, martabat nan anam na dipakaikan.
Indak basaku kiri jo kanan, tando alamaik nan bak kian, indak pangguntiang dalam lipatan.
Lihia lapek tak bakatuak, babalah sahinggo dado. Manyatokan urang ba leba alam. Tauik tak karuah karano ikan, gunuang tak runtuah karano kabuik. Urang gadang martabatnyo saba pahik manih pandai malulua, cando ka iyo kasadonyo.
Tagangnyo bajelo-jelo, kanduanyo badantiang-dantiang, bahati lapang bapaham salasai, cukuik syarat kato jo rundiang "Mansyaddah Qaumu fidduni walakhirach fauwa syaidun" Kok iyo adat basabdi syarak, syarak basandi jo kitabullah, bak kato papatah :

Si muncak mati tarambau
ka ladang mambao ladiang
lukolah paho kaduonyo
Adat jo Syarak di Minangkabau
bak aua nan jo tabiang
sanda basanda kaduonyo

SARAWA 

Basarawa hitam gadang kaki, kan panuruik alua nan luruih, ka panampuah jalan nan pasa, kadalam korong jo kampuang sarato Koto jo Nagari.
Langkah salasai baukuran, martabat nan anam mambatasi. Bajalan surang mintak dahulu, bajalan baduo mintak di tangah.
Tanah kudarang di nan hitam, paham hakikat tahan tapo, manahan sudi jo siasek. Kuma bapantang kalihatan, kokoh mangganggam nan sabinjek, lah kajadi sagadang incek jambu monyet itu nan ka jadi pantangannyo.....